هەڵەیەک روویدا! دووبارە هەوڵبدە
رووداو دیجیتاڵ
کۆبوونەوەی شاندی دەم پارتی لەگەڵ رێبەری زیندانیکراوی پەکەکە لە گرتووخانەی دوورگەی ئیمراڵی تەواو بوو.
شاندەکە کە لە پەروین بوڵدان، پەرلەمانتاری دەم پارتی لە بازنەی وان و فایەق ئۆزگور ئەرۆل، پارێزەری ئۆجەلان پێکهاتبوو، لەگەڵ عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) کۆبوونەوە و دواتریش گەڕانەوە.
بەگوێرەی نووسینگەی راگەیاندنی دەم پارتی، ئەحمەد تورک، سەرۆکی لەکارلادراوی گەورەشارەوانیی مێردین، بەهۆی تێکچوونی تەندروستیی لەگەڵ شاندەکەدا نەبووە؛ باسی لەوەش کرد، تورک سەلامەتە و هیچ پێشاتێکی نەرێنی لەبارەی تەندروستییەوە نییە.
هاوکات، سری سورەییا ئۆندەر، بریکاری سەرۆکی پەرلەمانی تورکیا و ئەندامی شاندەکە، دوای ئەوەی شەوی سێشەممە، 15ی نیسان بەهۆی جەڵتەی دڵەوە گەیێندرایە نەخۆشخانە و ئێستا لە بەشی چاودێریی چڕی نەخۆشخانەدا خەوێندراوە، لەگەڵ شاندەکە نەڕۆیشتووە.
ئەو سەردان و کۆبوونەوانەی شاندی ئیمراڵیی دەم پارتی لە کاتێکدان، ساڵی رابردوو هەنگاوێک لەلایەن حکومەتی تورکیاوە بۆ کۆتاییهێنان بە شەڕی پەکەکە و ئەو وڵاتە نرا.
ئەم هەنگاوە لەلایەن حکومەتی تورکیا بە ''کۆتاییهێنانی تیرۆر'' و لەلایەن دەم پارتییشەوە بە ''چارەسەرکردنی پرسی کورد'' ناوی دەهێنرێت.
شاندیی ئیمراڵیی دەم پارتی بەم سەردانەی ئەمڕۆ، تائێستا چوار جار لە گرتووخانەی ئیمراڵی لەگەڵ ئۆجەلان کۆبووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ