رووداو دیجیتاڵ
دۆناڵد ترەمپ، سەرۆکی ئەمریکا لە نوێترین لێدوانیدا رایگەیاند، "مۆڵەتێکیان" بۆ ئێران داناوە و بە بنیامین نەتەنیاهوو، سەرۆکوەزیرانی ئیسرائیلی گوتووە "بەردەوام بێت" لە هێرشەکانی. لەبارەی هێرشکردنە سەر ئێران گوتی: "رەنگە لە بنکە ئەتۆمییەکانی ئێران بدەین، رەنگە [هێرشەکە] نەکەم."
ترەمپ هەروەها ئێرانی بە "بێ توانا" و بێ بەرگریی ئاسمانی وەسف کرد و جەختی کردەوە کە دەبێت تاران خۆی رادەست بکات و دەستبەرداری بەرنامە ئەتۆمییەکەی بێت.
لێدوانەکانی ترەمپ لە کاتێکدایە کە شەڕی نێوان ئێران و ئیسرائیل چووەتە قۆناخێکی مەترسیدارەوە و راستەوخۆ رۆڵی ئەمریکا لەم ململانێیەدا ئاشکرا دەکات.
مۆڵەت بۆ ئێران و پشتیوانی بۆ ئیسرائیل
دۆناڵد ترەمپ بە رۆژنامەڤانانی راگەیاند: "ئێمە دوایین مۆڵەتمان داوەتە ئێران." سەرۆکی ئەمریکا هەروەها پشتگیریی تەواوی خۆی بۆ ئۆپەراسیۆنەکانی ئیسرائیل دووپاتکردەوە و گوتی: "من بە نەتەنیاهوم گوت بەردەوام بێت. من بە ئیسرائیلییەکانم گوت بەردەوام بن."
سەرۆکی ئەمریکا ئاماژەی بە مەترسیداریی دۆخەکە کرد و گوتی: "هەفتەی داهاتوو چارەنووسساز دەبێت. رەنگە کەمتریش لە هەفتەیەک."
ترەمپ بە زمانێکی تووند هێرشی کردە سەر تواناکانی ئێران و رایگەیاند: "ئێرانییەکان بە تەواوی بێ دەسەڵاتن و هیچ بەرگرییەکی ئاسمانییان نییە. تواناکانی سەربازیی ئێران زیانێکی زۆری بەرکەوتووە."
ترەمپ بانگەشەیەکی چاوەڕواننەکراویشی کرد و گوتی: "ئێرانییەکان نیازی خراپیان هەبوو. ئەوان پێشنیازییان کرد بێنە کۆشکی سپی." ترەمپ گوتیشی: "ئێران رووبەڕووی کێشەی زۆر بووەتەوە و دەیەوێت دانوستاندن بکات."
کاتێک پرسیارێکی لەبارەی چارەنووسی عەلی خامنەیی، رێبەری ئێرانەوە لێکرا، ترەمپ بە شێوەیەکی کورت وەڵامی دایەوە: "بەهیوای بەختێکی باش بۆ ئەو."
پرسیار لە ترەمپ کرا کەی ئارامیتان تەواو دەبێت؟ ترەمپ گوتی: "ئارامیمان دەمێکە تەواو بووە، هەر بۆیە ئەمە دەکەین."
مەرجی سەرەکی: خۆڕادەستکردن و وازهێنان لە بەرنامەی ئەتۆمی
سەرۆکی ئەمریکا مەرجەکانی واشنتنی بۆ کۆتاییهێنان بەم دۆخە خستەڕوو و گوتی: "ئێران دەبێت خۆی رادەست بکات و دەستبەرداری بەرنامە ئەتۆمییەکەی بێت."
لە کۆتاییدا، ترەمپ گومانی خۆی لەبارەی مانەوەی ئێران نیشاندا و گوتی: "نازانم ئێران تاکەی دەتوانێت خۆی رابگرێت."
لێدوانە راستەوخۆکانی دۆناڵد ترەمپ دوای ئەوە دێن کە جەنگی نێوان ئێران و ئیسرائیل لە شەشەمین رۆژیدا پێی نایە قۆناخێکی نوێوە. رۆژی چوارشەممە، ئیسرائیل رایگەیاند، کە هێرشی بەرفراوانی کردووەتە سەر ئامانجە هەستیارەکان لەنێو تارانی پایتەخت، لەوانەش "بارەگای بەڕێوەبەرایەتیی پۆلیسی ئێران" و بنکەکانی دروستکردنی پارچەی سەنتریفیوج بۆ بەرنامە ئەتۆمییەکەی.
ئەو قسانەی ترەمپ لە کاتێکدا بوون کە عەلی خامنەیی، رێبەری کۆماری ئیسلامیی ئێران، لە گوتارێکدا جەختی کردەوە کە وڵاتەکەی "هەرگیز خۆی بەدەستەوە نادات" و هۆشداریی "زیانی قەرەبوونەکراوەی" دایە ئەمریکا ئەگەر دەستێوەردان بکات.
لە رووی مرۆیی و ئابوورییەوە، جەنگەکە بووەتە هۆی کوژرانی سەدان کەس لە هەردوو وڵات، دروستبوونی کەمیی خۆراک و سووتەمەنی لە ئێران و ناجێگیری لە بازاڕەکانی وزەی جیهاندا. چاوەڕوان دەکرێت لێدوانەکانی ترەمپ ئەم ناجێگیرییە زیاتر بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ