رووداو دیجیتاڵ
بەڕێوەبەری پۆلیسی ناوەندی پارێزگای ئیلام رایگەیاند، بەهۆی کێشەیەکی خێزانییەوە، پیاوێک هاوژین و خوشکی هاوژینەکەی خۆی کوشتووە و دواتریش هەوڵی خۆکوشتنی داوە.
رووداوەکە دوێنێ پێنجشەممە روویداوە. قودرەت حەیدەریزاد، بەڕێوەبەری پۆلیسی شارەکە رایگەیاند، "دەستبەجێ تیمەکانمان گەیشتوونەتە شوێنی رووداوەکە و دوای لێکۆڵینەوەیەکی ورد، دەرکەوتووە کەسێک بەهۆی کێشەیەکی خێزانییەوە، تەقەی لە هاوژینەکەی و خوشکی هاوژینەکەی کردووە و هەردووکیانی کوشتوون.''
قودرەت حەیدەریزاد گوتی، "هەر لە پشکنینەکاندا دەرکەوتووە کە بکوژ دوای تاوانەکە، بە دەمانچە هەوڵی خۆکوشتنی داوە و بریندار بووە.''
وەک بەڕێوەبەری پۆلیسی شاری ئیلام دەڵێت، بکوژ بە برینداری گەیێندراوەتە نەخۆشخانە و تەندروستی ناجێگیرە.
قودرەت حەیدەریزاد رایگەیاند، دەست بەسەر ئەو دەمانچەیەدا گیراوە کە بکوژ تەقەی پێکردووە و تەرمی هەر دوو کوژراوەکەش گوێزراونەتەوە بۆ دادپزیشکیی ئیلام.
8ی نیسانی ئەم ساڵیش لە ئیلام، لە رووداوێکی هاوشێوەدا پیاوێک هاوژین و دوو منداڵی خۆی کوشت و دواتریش کۆتایی بە ژیانی خۆی هێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ