رووداو دیجیتاڵ
زیاتر لە 470 هەزار تۆن گەنم لە پارێزگای کەرکووک وەرگیراوە. سەرۆکی لیژنەی کشتوکاڵ لە ئەنجوومەنی پارێزگاکە دەڵێت، ئەو جووتیارانەی تاوەکو شەوی رابردوو ناویان تۆمارکردووە، گەنمەکانیان لێوەردەگیرێت.
عەبدوڵڵا میروەیس، سەرۆکی لیژنەی کشتوکاڵ لە ئەنجوومەنی پارێزگای کەرکووک، ئەمڕۆ چوارشەممە، 9ـی تەمموزی 2025 بە تۆڕی میدیایی رووداوی گوت: "زیاتر لە 470 هەزار تۆن گەنم لە هەر چوار سایلۆی کەرکووک وەرگیراوە".
لە 25ی مانگی ئایارەوە وەرگرتنی گەنم لە کەرکووک دەستیپێکرد و دوێنێ سێشەممە کۆتایی هات.
رۆژانە 12 بۆ 13 هەزار تۆن گەنم لە رێگەی 350 بارهەڵگرەوە رادەستکرا . عەبدوڵڵا میروەیس گوتی: "هەندێک جووتیار کێشەی وەرگرتنی گەنمیان هەبوو، بەتایبەتی جووتیارانی کورد، بۆیە ئەو جووتیارانەی تاوەکو شەوی رابردوو هاتن و ناوی خۆیان تۆمارکرد، دەرگای سایلۆیان بەڕوودا داناخرێت و گەنمەکانیان لێوەردەگیرێت".
لە کەرکووک چوار سایلۆ هەن؛ کەرکووک، زاب، حەویجە و تازە.
بۆ ساڵى 2025، پێنج ملیۆن و 100 هەزار دۆنم زەوى لە سەرانسەرى عێراق لەنێو پلانى کشتوکاڵ بوو بۆ چاندنى گەنم، ئەمەش نیوەی ئەو رووبەرەیە کە پار رێگەی پێدرا.
بە بڕیارى ئەنجوومەنى وەزیرانی عێراق، ئەو گەنمەى بە شێوازى نوێى ئاودێرى بەرهەم هێندرابێت، هەر تۆنێکى بە 850 هەزار دینار وەردەگیرێت، ئەگەر بە شێوازى کۆن ئاودرابێت هەر تۆنێکى بە 800 هەزار دینار وەردەگیرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ