گۆشتفرۆشییەک لە هەرێمی کوردستان. وێنە: بڵند تاهیر - رووداو
رووداو دیجیتاڵ
بەڕێوەبەری سامانی ئاژەڵ لە دهۆک دەڵێت، زیاتر لە 60٪ـی مریشک و هێلکەی بەرهەمهاتوو لە پارێزگاکە هەناردەی نێوەڕاست و خوارووی عێراق دەکرێن. ئاماژە بەوەش دەکات، ''بۆ دابینکردنی گۆشتی سوور نەگەیشتووینەتە ئاستی خۆبژێوی''.
ئەمڕۆ پێنجشەممە، 11-09-2025، رێدیر سدقی، بەڕێوەبەری سامانی ئاژەڵ لە دهۆک لەکاتی بەشداریکردنی لە بووڵتەنی کاژێر 13:00ـی تۆڕی میدیایی رووداو کە دڵدار هەرکی پێشکێشیکرد، رایگەیاند، ئەم ساڵ لە بواری مریشک و هێلکەوە گەیشتوونەتە ئاستی خۆبژێوی و هەناردەیان بۆ خواروو و نێوەڕاستی عێراق دەبێت.
لەکاتێکدا دهۆک ساڵانە پێوستی بە 35 هەزار بۆ 37 هەزار تۆن مریشکە، رێدیر سدقی پێشبینی دەکات ئەم ساڵ 40 هەزار بۆ 42 هەزار تۆن مریشک لە پارێزگاکە بەرهەم بهێنرێت.
هاوکات بەڕێوەبەری سامانی ئاژەڵ لە دهۆک پێشبینی ئەوەش دەکات، پێویستیی رۆژانەی پارێزگاکە بۆ هێلکە دەگاتە نزیکەی هەزار و 500 بۆ هەزار و 700 کارتۆن، ''لەکاتێکدا ئێستا رۆژانە دوو هەزار بۆ چوار هەزار کارتۆن هێلکە بەرهەم دەهێنرێت''.
رێدیر سدقی ئاماژەی بەوە کرد، 60٪ بۆ 70٪ـی ئەو هێلکە و مریشکەی لە پەلەوەرخانەکانی پارێزگاکە بەرهەم دەهێنرێن، هەناردەی شارەکانی نێوەڕاست و خوارووی عێراق دەکرێن.
بەپێی ئامارێکی وەزارەتی کشتوکاڵی هەرێمی کوردستان کە بە رووداوی داوە، 1984 پرۆژەی پەلەوەرخانە هەن کە بۆ گۆشت جووجەڵە گەورە دەکەن و توانای بەرهەمهێنانیان 285 هەزار تۆنە، بەڵام هەرێمی کوردستان پێویستی بە 150 هەزار تۆنە و ئەوەی لە پێویستی نێوخۆیی زیاترە هەناردەی پارێزگاکانی عێراق دەکرێت.
هەروەها 55 پرۆژەی مریشکی (هێلکەکەر) هەن کە لە رۆژێکدا 21 هەزار کارتۆن هێلکە بەرهەم دەهێنن و پێویستیی رۆژانە 7 هەزار کارتۆنە و باقییەکەی هەناردە دەکرێت.
''ساڵانە زیاتر لە 44 هەزار تۆن گۆشتی ماسی بەرهەم دەهێنرێت''
بەڕێوەبەری سامانی ئاژەڵ لە دهۆک دەڵێت، ''لە سنووری پارێزگاکە 51 پڕۆژەی فەرمیی بەخێوکردنی ماسی لێیە و ساڵانە نزیکەی 44 هەزار و 200 تۆن ماسی بەرهەم دەهێنرێت.''
رێدیر سدقی ئاماژەی بەوەش کرد، لە هەندێک وەرزی ساڵدا، نزیکەی 90٪ـی پێویستیی نێوخۆیی بۆ ماسی دابین دەکرێت، ''بەڵام لە هەندێک کاتی دیکەی وەکو وشکەساڵیدا، 75٪ بۆ 80٪ـی لە نێوخۆ دابین دەکرێت و ئەوەی دەمێنێتەوە، لە دەرەوەی وڵاتەوە هاوردە دەکەین.''
بەگوتەی بەڕێوەبەری سامانی ئاژەڵ لە دهۆک، جیا لە پڕۆژەکان، زیاتر لە 500 راوچیش ماسیی رووبارەکان راو دەکەن و دەیانخەنە بازاڕەوە.
''بۆ گۆشتی سوور نەگەیشتووینەتە ئاستی خۆبژێوی''
رێدیر سدقی ئاماژەی بە پێویستیی گۆشتی سووری پارێزگای دهۆک کرد و گوتی، ساڵانە پێویستییان بە نزیکەی 22 هەزار تۆن گۆشتی سوور هەیە، ''بەڵام هێشتا نەگەیشیتووینەتە ئاستی خۆبژێوی.''
بەگوتەی بەڕێوەبەری سامانی ئاژەڵ لە دهۆک، ناچارن بۆ دابینکردنی گۆشتی سووری پێویست، لە دەرەوەی وڵاتەوە ئاژەڵ هاوردە بکەن، ''چونکە توانای دابینکردنی 40٪ـی پێویستیی گۆشتی سووری پارێزگاکەمان هەیە.''
لە سنووری دهۆک 28 پڕۆژەی بەخێوکردن و قەڵەوکردنی گا و گوێرەکە بۆ دابینکردنی گۆشتی سوور هەن. رێدیر سدقی ئەوەشی خستەڕوو، ''زیاتر لە هەزار گا و مانگاش لە دەرەوەی پڕۆژەکان و لەنێو گوندەکاندا بەخێودەکرێن.''
بەڕێوەبەری سامانی ئاژەڵ لە دهۆک باسی لەوە کرد، 48 پڕۆژەی بەخێوکردن و قەڵەوکردنی مەڕ و بزنیش لە سنووری پارێزگاکە هەن، ''بەڵام رێژەی هەرە زۆری ئەو ئاژەڵانە (مەڕ و بزن) لە دەرەوەی پڕۆژەکان و لەنێو گوندەکاندا بەخێودەکرێن.''
هاوکات لە سنووری پارێزگای دهۆک 14 پڕۆژەی بەخێوکردنی مانگا بۆ بەرهەمهێنانی شیر و بەرهەمە شیرەمەنییەکان هەن. رێدیر سدقی دەڵێت، ''رۆژانە 120 تۆن شیریان دەبێت و نزیکەی 65٪ بۆ 70٪ـی پێویستیی شیری پارێزگاکە دابین دەکەن، ئەوەی دەمێنێتەوە لە دەرەوەی وڵاتەوە هاوردە دەکرێت.''
بەپێی ئامارێکی بەڕێوەبەرایەتیی سامانی ئاژەڵ لە وەزارەتی کشتوکاڵ و سەرچاوەکانی ئاوی هەرێمی کوردستان، لە هەرێمی کوردستاندا 5 ملیۆن مەڕ و بزن و 250 هەزار گا و مانگا هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ