کوردستان
بەڕێوەبەری ڤێتێرنەری پارێزگای سنە دەڵێت، لە ساڵێکدا زیاتر لە 11 تۆن گۆشتی ئەسپ لە لایەن تیمەکانیانەوە دەستی بەسەردا گیراوە
رووداو دیجیتاڵ
بەڕێوەبەری گشتیی ڤێتێرنەری پارێزگای سنە دەڵێت، لە ساڵێکدا زیاتر لە 11 تۆن گۆشتی ئەسپ لە لایەن تیمەکانیانەوە دەستی بەسەردا گیراوە و 32 کەسیش بە تۆمەتی فرۆشتنی گۆشتی ئەسپ دەستبەسەر کراون.
کامەران زیبا کردار، بەڕێوەبەری گشتیی ڤێتێرنەری پارێزگای سنە، رۆژی هەینی، 14-3-2025 رایگەیاند: "لە ساڵێکدا زیاتر لە 11 تۆن گۆشتی ئەسپ لە لایەن تیمەکانمانەوە دەستی بەسەردا گیراوە و لەنێوبراوە."
زیبا کردار گوتی: "لەو ماوەیەدا 26 ئەسپی زیندووش دەستیان بەسەردا گیراوە، بەر لەوەی سەرببڕدرێن. 32 کەسیش بە تۆمەتی فرۆشتنی گۆشتی ئەسپ دەستبەسەر کراون و لە دادگە دۆسیەیان بۆ کراوەتەوە؛ دوو سەربڕخانەش داخراون."
بە گوتەی بەڕێوەبەری گشتیی ڤێتێرنەریی پارێزگای سنە، سەربڕینی ئەسپ زیاتر لە هەندێک ناوچەی دەوروبەری شاری سنە و لەلایەن هەندێک کەسی بەرژەوەندخوازەوە دەکرێت و هۆشداری دەدات، چاودێرییەکانیان زیاتر دەکەن و رێکاری تووندی یاساییش بەرامبەر ئەو کەسانەی گۆشتی ئەسپ دەفرۆشن، دەگرنەبەر.
زیبا کردار هۆشداری دا، خواردنی گۆشتی ئەسپ مەترسیی گواستنەوەی نەخۆشیی نێوان مرۆڤ و ئاژەڵ زیاد دەکات و داوای لە خەڵکیش کرد، "لە پێناو پاراستنی تەندروستی خۆیان و خێزانەکانیان خۆیان لە کڕین و خواردنی ئەم جۆرە گۆشتە بەدوور بگرن" و تەنیا گۆشتی ئەو ئاژەڵانە بەکاربێنن لە سەربڕخانە رێگەپێدراوەکاندا لەژێر چاودێریی تەندروستی و ئایینی ڤێتێرنەریدا سەردەبڕدرێن.
کامەران زیبا کردار دەڵێت، بەهۆی مەترسییە تەندروستی و ژینگەییەکانی سەربڕینی ئەسپ، بە فەرمانی داواکاری گشتی سنە، لقێکی تایبەت بۆ مامەڵەکردنی خێرا و یەکلاییکەرەوە لەگەڵ ئەو جۆرە پێشێلکارییانە دیاری کراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ