رووداو دیجیتاڵ
پڵنگێک لە گوندێکی پارێزگای ئیلامی رۆژهەڵاتی کوردستان چووە نێو گوندێک و چەند سەرێک مەڕی خنکاند و بریندار کرد. بەڕێوەبەری پۆلیسی شارەکە دەڵێت، دانیشتووانی گوندەکە سەلامەتن.
رووداوەکە دوای نیوەڕۆی هەینی 21-02-2025 لە گوندی فەرهادئاوای سەر بە شاری دەڕەشاری پارێزگای ئیلام روویدا.
کەرەم حوسێنی، بەڕێوەبەری پۆلیسی دەڕەشار گوتی، پڵنگەکە چوار سەر مەڕی خنکاندووە و پێنجی دیکەشی بە سەختی بریندار کردووە.
کەرەم حوسێنی باس لەوە دەکات، لە ئەنجامی هێرشی پڵنگەکە کەس بریندار نەبووە.
دەڕەشار دەکەوێتە داوێنێ چیاکانی زاگرۆس و نزیکە لە دارستان، بۆیە زۆرجار خەڵکی ناوچەکە بەتایبەتی گوندنشینانی ناوچەکە، ورچ، پڵنگ، گورگ و ئاژەڵی دیکەی هاوشێوە دەبینن.
لە ئێران و رۆژهەڵاتی کوردستان پڵنگ یەکێک لەو ئاژەڵانەیە کە مەترسیی لەنێوچوونی لەسەرە، بۆیە کاتێک هێرش دەکاتە سەر رانەمەڕی گوندنشینان، پەلاماردانی رێگەپێدراو نییە، بەڵام لەلایەن بەڕێوەبەرایەتیی پاراستنی ژینگە قەرەبوو دەکرێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ