هەڵەیەک روویدا! دووبارە هەوڵبدە
رووداو دیجیتاڵ
وەزارەتی پەروەردە دەڵێت، لەم ساڵەوە بڕیارمان دا بۆ راگەیاندنی ئەنجامەکانی پۆلی 12ـی ئامادەیی بە هەموو بەشەکانییەوە کۆنفرانسی رۆژنامەڤانی ناکەین و بە رێگەی دیجیتاڵی نمرەی قوتابییان رادەگەیێنین.
ئەمڕۆ یەکشەممە 25-5-2025، وەزارەتی پەروەردەی هەرێمی کوردستان رایگەیاند، "لەم ساڵەوە چەند بڕیارێکی گرنگ لە لیژنەی باڵای هەمیشەیی تاقیکردنەوە گشتییەکانەوە دراوە. بۆ راگەیاندنی ئەنجامەکانی پۆلی 12ـی ئامادەیی بە هەموو بەشەکانییەوە کۆنفرانسی رۆژنامەڤانی ناکەین و بە رێگەی دیجیتاڵی نمرەی قوتابییان رادەگەیێنین."
بە گوێرەی وەزارەتەکە، هیچ پێوەرێک لەسەر ئاستی تاک بۆ ناساندنی ئاستەکانی (یەکەم، دووەم و سێیەم) و هیچ پلەبەندییەک رانەگەیێنرێت؛ هاوکات پێویستە سەرجەم پەروەردە گشتییەکان، قەزاکان و قوتابخانەکان پابەندی بڕیارەکە ببن.
لە ساڵی خوێندنی 2024- 2025ـەوە، وەزارەتی پەروەردە هیچ جۆرە رێوڕەسمێکی خەڵاتکردن سازناکات و ئامادەی هیچ بۆنەیەکی لەو شێوەیەش نابن.
لە راگەیێنراوەکەی وەزارەتی پەروەردەی هەرێمی کوردستاندا هاتووە، "هەر کەسێک و کارمەندێکی نێو بازنەی وەزارەتەکە سەرپێچی بکات، ئاستی قوتابی رابگەیێنێت و رێوڕەسم سازبکات، رێکاری پێویستیی یاسایی بەرامبەر دەگیرێتەبەر."
وەزارەتی پەروەردە، بنەمای هەڵسەنگاندن بۆ شێوازێکی دیکەی زانستیانە دەگۆڕێت و لەم دوو خاڵەی خوارەوە کورتی دەکاتەوە:
１- رێژە و تێکڕای نمرەی دەرچوونی قوتابییانی هەر قوتابخانەیەک پاش راگەیاندنی ئەنجامی تاقیکردنەوەکانی خولی دووەم، نمرەکان دەبنە پێوەر بۆ دیاریکردنی ئاستی زانستیی قوتابخانەکە؛ هاوکات ئەنجامەکە بۆ پەروەردە گشتییەکان، قەزا و قوتابخانەکان دەنێردرێت.
２- نمرەی پێوانەیی (الدرجة المعیاریة) و تێکڕای ژمێرەیی (متوسط الحسابي) هەر بابەتێک لە بابەتەکانی 12ـی ئامادەیی بە هەموو بەشەکانییەوە لە پاش تەواوبوونی خولی دووەم دەبێتە بنەمای هەڵسەنگاندنی مامۆستای بابەت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ