کۆبوونەوەی مەسرور بارزانی و رەجەب تەیب ئەردۆغان.
رووداو دیجیتاڵ
سەرۆکوەزیرانی هەرێمی کوردستان و سەرۆککۆماری تورکیا لە دووبەی کۆبوونەوە و بەشێکی کۆبوونەوەکەیان لەبارەی پەیوەندییەکانی نێوان هەولێر و ئەنقەرە بوو.
بەگوێرەی راگەیێندراوێکی حکومەتی هەرێمی کوردستان، لە کۆبوونەوەکەدا کە وەزیرانی دەرەوە و بەرگری و وزە و سەرچاوە سروشتییەکان و بازرگانيی تورکیا ئامادەی بوون، بارودۆخی گشتیی عێراق و ناوچەکە و پەرەپێدانی پەیوەندیى دوولایەنە تاوتوێ کرا.
ئەوەش هاتووە کە، هەردوولا جەختیان لە گرنگیی پتەوکردنی هاریکاری و هەماهەنگی لە پێناو پاراستنی ئاسایش و سەقامگیریی ناوچەکە کردەوە.
کۆبوونەوەکە دوای نیوەڕۆی ئەمڕۆ سێشەممە 13-2-2024، بەڕێوەچوو.
سەنگەر عەبدولڕەحمان، نێردراوی رووداو بۆ رووماڵی لووتکەی جیهانیی حکومەتەکان لە دووبەی گوتی، مەسرور بارزانی و رەجەب تەیب ئەردۆغان باسیان لە پەیوەندییەکانی نێوان هەولێر و ئەنقەرە و گۆڕانکارییەکانی ناوچەکە کردووە.
پەیوەندییەکی بەهێز لەنێوان حکومەتی تورکیا و حکومەتی هەرێمی کوردستان هەیە و ساڵانە چەندینجار بەرپرسانی باڵایان یەکدی دەبینن.
ئەم کۆبوونەوەیە لە کاتێکدایە، رۆژی 06-02-2024 یەشار گولەر، وەزیری بەرگری تورکیا و مەتین گوراک، سوپاسالاری ئەو وڵاتە گەیشتنە هەولێر، ئەوەش دوای کۆبوونەوەیان لەگەڵ محەممەد شیاع سوودانی، سەرۆکوەزیرانی عێراق، لەتیف رەشید، سەرۆککۆمار و قاسم ئەعرەجی، راوێژکاری ئاسایشی نەتەوەیی عێراق لە بەغدا.
وەزیری بەرگریی تورکیا رۆژی 07-02-2024 لە هەولێر بە جیا لەگەڵ سەرۆک بارزانی؛ نێچیرڤان بارزانی، سەرۆکی هەرێمی کوردستان؛ مەسرور بارزانی، سەرۆکوەزیران و قوباد تاڵەبانی، جێگری سەرۆکوەزیران کۆبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ