هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری هۆبەی مەشق و راهێنان لە لقی هەولێری کۆمیسیۆنی باڵای سەربەخۆی هەڵبژاردنەکانی عێراق رایگەیاند، رۆژی دەنگدان، کاژێر 18:00 سندووقەکان دادەخرێن و دوای ئەو کاتە تاوەکو 12:00ی شەو دەبێت داتا و زانیارییەکان بۆ بەغدا بنێرن، ئەگەرنا دەچێتە ناوەندی وردبینی.
رۆژی یەکشەممە، 12ی تشرینی یەکەمی 2025، ئەیسەر یاسین بە تۆڕی میدیایی رووداوی راگەیاند: "کاژێر 18:00 ئامێرەکانی دەنگدان دەوەستن و دەنگدان تەواو دەبێت. دوای ئەو کاتە شەش کاژێرمان هەیە تاوەکو بتوانین داتا و زانیارییەکان لە رێگەی مانگی دەستکردەوە بۆ بەغدا بنێرین، ئەگەر تاوەکو 12:00ی شەو زانیارییەکان نەنێرین، ئەوا ئەو بنکەیەی دەمێنێتەوە دەنێردرێتە ناوەندی وردبینی."
بە گوتەی ئەیسەر یاسین، 24 کاژێر دوای پرۆسەی دەنگدان، ئەنجامی بەرایی رادەگەیێندرێت و ئەو کاتە تانە لە ئەنجامە بەراییەکان نادرێت.
بەڕێوەبەری هۆبەی مەشق و راهێنان لە لقی هەولێری کۆمیسیۆن گوتیشی، دوای ئەوەی زانیاری و داتاکان بۆ ناوەندی وردبینی دەنێردرێن، راستەوخۆ بەپێی وێستگەکان دەست بە وردبینی دەکەن بۆ یەکلایی کردنەوە ئەنجامی کۆتایی.
لەبارەی ئەنجامی کۆتایی ئەیسەر یاسین باسی لەوەکرد: "زیاتر لە 15 رۆژ بۆ ئەنجامی کۆتایی پێویستە، ئەویش لەسەر تانەی بەربژێران دەمێنێتەوە. تاوەکو تانەکان یەکلایی نەکرێنەوە و دووبارە وردبینییان بۆ نەکرێت، ئەنجامی کۆتایی راناگەیێندرێت."
بڕیارە رۆژی 11-11-2025، هەڵبژاردنی پەرلەمانی عێراق بەڕێوەبچێت. پەرلەمانی عێراق لە 329 کورسی پێکدێت و 7,768 بەربژێر کێبڕکێی بەدەستهێنانیان دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ