جەهەپە: ئەندامەکانمان نانێرین بۆ ئیمرالی

 

 

دوای نیوەڕۆی ئەمڕۆ هەینی کۆبوونەوەی کۆمیسیۆنی پاڵپشتیی نیشتمانی، برایەتی و دیموکراسی دەستیپێکرد و بەردەوامە، چاوەڕوان دەکرێت لە کۆبوونەوەکەدا بڕیار لەسەر چوون یان نەچوونی شاندێکیان بۆ دوورگەی ئیمرالی و دیدار لەگەڵ عەبدوڵڵا ئۆجەلان بدات.

 

پێش تەواوبوونی کۆبوونەوەکە، موراد ئەمیر، بریکاری سەرۆکی فراکسیۆنی پارتی گەلی کۆماری (جەهەپە) رایگەیاند، دەستەی راپەڕاندنی ناوەندیی حیزبەکەیان کۆبوونەتەوە و بڕیاریان داوە، "بەشداری نەکەین لەو شاندەی دەچنە ئیمرالی".

 

بریکاری سەرۆکی فراکسیۆنی جەهەپە گوتی: "کارەکانمان لە لیژنەکەدا بەردەوام دەبێت و ناکشێینەوە".

 

دەوڵەت باخچەلی، سەرۆکی پارتی بزووتنەوەی نەتەوەیی (مەهەپە) رۆژی سێشەممە 18-11-2025 لە کۆبوونەوەی فراکسیۆنی پارتەکەیدا ئەگەری سەردانی کۆمیسیۆنەکە بۆ دوورگەی ئیمرالی و دیدار لەگەڵ عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) هێنایە بەر باس کە ئێستا رۆژەڤی گەرمی ئەنقەرەیە.

 

باخچەلی بە پێویستی زانی بابەتی دیداری ئیمرالی یەکلایی بکرێتەوە و گوتی، "ئەگەر راستەوخۆ پەیوەندی لەگەڵ ئەو کەسە دروست نەکرێ کە لایەنی راستەقینەی پرۆسەکەیە، چۆن ئەنجام بەدەست دێت و بەرەوپێشچوون تۆمار دەکرێت؟ ئەگەر ئەو کۆمیسیۆنەی پەرلەمان لەم چوارچێوەیەدا بڕیارنەدات و هیچ کەسێک ئەم سەردانە نەکات و هەمووان پێداگری لەسەر یاریی سێ مەیموونەکە بکەن، بە روونی دەڵێم، سێ هاوڕێم لەگەڵ خۆم دەبەم و لەسەر حیسابی خۆم دەڕۆمە ئیمرالی و سڵ لەوە ناکەمەوە کە لەسەر مێزێک رووبەڕوو لەگەڵی دابنیشم".

 

باخچەلی هەروەها رایگەیاند، هەرچی هەیە رووبەڕوو لەگەڵ ئۆجەلان باسی دەکات.