هەڵەیەک روویدا! دووبارە هەوڵبدە
رووداو دیجیتاڵ
ریال مەدرید بەر لە یارییەکەی بەرامبەر مایۆرکا، کە ئەمشەولە یاریگای سانتیاگۆ بێرنابیۆ بەڕێوەدەچێت، رووبەڕووی قەیرانی پێکهاتە بووەتەوە، کارلۆ ئەنچێلۆتی راهێنەری یانەکە بەهۆی زۆری پێکان و سڕکردنەوە ناچاربووە هەشت یاریزانی ئەکادیمیا بانگهێشت بکات.
دە یاریزانی یانەکە بەردەست نین، لەنێویاندا ڤینیسیۆس جونیۆر، رۆدریگۆ، کارڤاخال، رودیگێر و کاماڤینگا.
هەروەها ئۆرێلیان چوامێنی بەهۆی سڕکردنەوە لە یارییەکەدا بەشدار نابێت، ئەمەش کێشەی زیاتر بۆ هەڵبژاردنەکانی یانەکە دروست کردووە.
بۆ پڕکردنەوەی ئەو بۆشاییانە، ئەنچێلۆتی رووی لە ریزەکانی لاوان کردووە و چەند یاریزانێکی فێرگەی کاستیای بانگهێشت کردووە، لەنێویاندا سێرخیۆ مێسترێ، یوسف 'یوسی'، جاکۆبۆ رامۆن و ڤیکتۆر مونیۆز - کە دوای یەکەم دەرکەوتنی پڕ گوشار لە یاریی کلاسیکۆدا گەڕایەوە پێکهاتەکە، لەوێدا چانسی کۆتایی یارییەکەی بەهۆی پێکان لەدەستدا و رووبەڕووی رەخنەی زۆری ئۆنلاین بووەوە.
کارلۆ ئەنچێلۆتی زۆری نەماوە لەگەڵ ریال مەدرید، بۆیە دەیەوێت ئەوەی ماویەتی بەسەرکەوتوویی بەڕێی بکات.
سەرەڕای ئەو ئاستەنگانە، ریال مەدرید هەوڵ دەدات بردنەوەیەکی یەکلاکەرەوە بەدەستبهێنێت و پارێزگاری لە خێرایی و ئاستی تیپەکە بکات لەگەڵ نزیکبوونەوەی کۆتایی وەرزەکە.
یەکێک لەو رەخنانەی ئەم وەرزە ئاراستەی ئەنچێلۆتی کرا ئەوەبوو کە پشتی بە یاریزانە لاوەکان نەدەبەست و دەرفەتی بۆ یاریزانانی کاستیا نەڕەخساند بۆ ئەوەی دەربکەون، وەک ئەوەی لە بارسێلۆنا دەکرێت و ساڵانە چەندین یاریزانی لاو لە لاماسیاوە سەردەخاتە تیپی یەکەم و وەک ئەستێرە دەردەکەون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ