دیک سخۆف، سەرۆکوەزیرانی هۆڵەندا
رووداو دیجیتاڵ
سەرۆکوەزیرانی هۆڵەندا بە ئاڵا شاڵی، پەیامنێری تۆڕی میدیایی رووداوی راگەیاند، کۆبوونەوەکەی لەگەڵ نێچیرڤان بارزانی، سەرۆکی هەرێمی کوردستان "نایاب بوو، چونکە ئێمە پەیوەندییەکی نایابمان هەیە."
ئەمڕۆ (شەممە، 15-2-2025) نێچیرڤان بارزانی، سەرۆکی هەرێمی کوردستان لە میونشن لەگەڵ دیک سخۆف، سەرۆکوەزیرانی هۆڵەندا کۆبووەوە.
دوای کۆبوونەوەکە، سخۆف قسەی بۆ ئاڵا شاڵی کرد و گوتی "کۆبوونەوەکە نایاب بوو، چونکە ئێمە پەیوەندییەکی نایابمان هەیە".
دیک سخۆف لەبارەی هەڵبژاردنی پەرلەمانی هەرێمی کوردستان و هەوڵەکان بۆ پێکهێنانی کابینەی نوێی حکومەتیش قسەی کرد و رایگەیاند "پێموایە هەڵبژاردنەکە زۆر بە باشی بەڕێوەچوو. ئەوەش بۆ گەشە [ـی هەرێمی کوردستان] زۆر گرنگە. پێموایە ئێستا ئێوە لە هەولێر چاوەڕێی پێکهێنانی حکومەتێکی نوێی هاوپەیمانین و هیوادارم سەرکەوتوو بن. بە شێوەیەکی نەریتی، پەیوەندیی نێوان هۆڵەندا، سەرۆک و سەرۆکوەزیران (ـی هەرێمی کوردستان) هەمیشە نایاب بووە."
پێشهاتەکانی ناوچەکە بەشێکی دیکەی گفتوگۆکانی نێوان سەرۆکی هەرێمی کوردستان و سەرۆکوەزیرانی هۆڵەندا بوون. دیک سخۆف بە رووداوی گوت، "ئەوەی کە سەرۆک بارزانی [نێچیرڤان بارزانی] گوتی، ئەوەیە؛ گرنگە کورد لەگەڵ حکومەتی سووریا لەپەیوەندیدا بن و ببنە بەشێکی حکومەتی نوێی سووریا."
سەرۆکایەتیی هەرێمی کوردستان لە راگەیێندراوێکدا لەبارەی کۆبوونەوەکە گوتبووی، پەیوەندییەکانی هۆڵهندا لهگهڵ عێراق و هەرێمی کوردستان، چۆنيێتیی پتهوكردنى هاريکاریی هاوبەش لە بوارە جياجیاکان تاوتوێ كرا، ههروهها بيروڕا لهبارهى پێشهاتە سیاسی و ئەمنییەکانی ناوچەکه، بهتايبهتى دۆخى سووريا ئاڵوگۆڕ کرا.
وەک لە راگەیێندراوەکەدا هاتووە، نێچیرڤان بارزانی جەختی لەسەر گرنگیی هاوبەشی لەگەڵ هۆڵەندا کردەوە و ستایشی رۆڵی هۆڵەندای لە چوارچێوەی هاوپەیمانيێتیی نێودەوڵەتی بۆ بەرەنگاربوونەوەی تیرۆر و پشتگیریی بەردەوامی لە راهێنانی هێزەکانی پێشمەرگە و بەهێزکردنی تواناکانیان کردووە.
بەگوێرەی راگەیێندراوەکە دیک سخۆڤ ئامادەیی هۆڵەندای بۆ بەردەوامیی پشتگیریی هەرێمی کوردستان دووپاتکردووەتەوە و ئاماژەی بە خواستی وڵاتەکەی بۆ پەرەپێدانی هاوکاریی هاوبەش بهتايبهتى له بوارى ئاسايش و ئابووريدا کرد.
دەقی پرسیار و وەڵامەکانی ئاڵا شاڵی، پەیامنێری رووداو لەگەڵ سەرۆکوەزیرانی هۆڵەندا:
رووداو: بەڕێز سەرۆکوەزیران، کۆبوونەوەکەتان لەگەڵ سەرۆکی هەرێمی کوردستان چۆن بوو؟
دیک سخۆف، سەرۆکوەزیرانی هۆڵەندا: کۆبوونەوەکە نایاب بوو، چونکە ئێمە پەیوەندییەکی نایابمان هەیە؛ هەروەها پێموایە هەڵبژاردنەکە زۆر بە باشی بەڕێوەچوو. ئەمەش بۆ گەشە [ـی هەرێمی کوردستان] زۆر گرنگە. پێموایە ئێستا ئێوە لە هەولێر چاوەڕێی پێکهێنانی حکومەتێکی نوێی هاوپەیمانن و هیوادارم سەرکەوتوو بن. بەشێوەیەکی نەریتی، پەیوەندیی نێوان هۆڵەندا، سەرۆک و سەرۆکوەزیران (ـی هەرێمی کوردستان) هەمیشە نایاب بووە.
رووداو: باشە ئێوە چۆن دەتوانن هاوکاریی کورد بکەن لە سووریا بۆ ئەوەی بگەنە مافەکانیان؟
دیک سخۆف، سەرۆکوەزیرانی هۆڵەندا: ئەوەی سەرۆک بارزانی [نێچیرڤان بارزانی] گوتی، ئەوەیە؛ گرنگە کورد لەگەڵ حکومەتی سووریا لەپەیوەندیدا بن و ببنە بەشێکی حکومەتی نوێی سووریا، ئەمە زۆر گرنگە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ