رێبەر ئەحمەد، وەزیری ناوخۆی حکومەتی هەرێمی کوردستان.
رووداو دیجیتاڵ
وەزیری ناوخۆی حکومەتی هەرێمی کوردستان لە کۆنفرانسێکی رۆژنامەڤانیدا لەبارەی پرۆسەی ئاشتی و بڕیاری چەکدانانی پەکەکە دەڵێت، "هەرچیمان لەدەست بێت بۆ ئاسانکاری ئەم پرۆسەیە درێخی ناکەین و ئەوەی گرنگە ناوچەکانی هەرێمی کوردستان لە پێکدادانی چەکداری رزگاری بێت."
رێبەر ئەحمەد، وەزیری ناوخۆی حکومەتی هەرێمی کوردستان، ئەمڕۆ دووشەممە 12-5-2025 رایگەیاند، "سەرکردایەتیی هەرێمی کوردستان هەمیشە پشتگیری و پاڵپشتیی خۆی بۆ پرۆسەکە دەربڕیوە و هەرچیمان لەدەست بێت بۆ ئاسانکاری ئەم پرۆسەیە درێخی ناکەین، جارێ زووە بۆ ئەوەش کە بڕیار بدرێت پەکەکە چۆن و لەکوێ چەکەکان دادەنێت."
رێبەر ئەحمەد گوتی، "ئەوەی گرنگە ناوچەکانی هەرێمی کوردستان لە پێکدادانی چەکداری رزگاریان بێت و هاونیشتمانیان بتوانن بگەڕێنەوە گوند و ناوچەکانی خۆیان و سوود لە رەز و باخەکانیان وەربگرنەوە و ئاشتی و سەقامگیری بگەڕێتەوە."
بەیانیی ئەمڕۆ، پەکەکە ئەنجامی کۆنگرەی 12ی خۆی راگەیاند، کە لە 5-7ـی ئایار بەڕێوەچوو، بەپێی ئەنجامی کۆنگرەکە پەکەکە بە فەرمی هەڵوەشاندنەوەی خۆی راگەیاند.
هێزەکانی پەکەکە لە چەند ناوچەیەکی کوردستانن، لەوانە قەندیل و خواکوڕک. رەنجە جەمال، پەیامنێری رووداو لە وەزیری ناوخۆی پرسی، ئایا چ هێزێک لە ناوچەکانی ژێر دەسەڵاتی پەکەکە جێگیر دەکرێت؟ گوتی، "جارێ پرۆسەکە لە قۆناخەکانی سەرەتادایە و دەکرێت لە داهاتوودا باس لەو بابەتە بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ