هەڵەیەک روویدا! دووبارە هەوڵبدە
رووداو دیجتاڵ
دهۆک یەکەم و نەجەف دوایین پارێزگایە لە وەرگرتنەوەی کارتی بایۆمەتریی نوێی دەنگدان بۆ ئەو کەسانەی یەکەمجارە دەتوانن دەنگ بدەن. لە کۆی 3.5 ملیۆن کارتی نوێ بۆ هەڵبژاردنی پەرلەمانی عێراق، لەسەر ئاستی عێراق 44.8%یان وەرگیراوەتەوە.
بە گوێرەی ئامارەکانی کۆمیسیۆنی باڵای سەربەخۆی هەڵبژاردنەکانی عێراق، تاوەکو ئەمڕۆ پێنجشەممە، 16ی تشرینی یەکەم، لە کۆی سێ ملیۆن و 583 هەزار و 703 کارتی بایۆمەتری کە بۆ یەکەمجارە دەتوانن دەنگی پێبدەن بۆ هەڵبژاردنی پەرلەمانی عێراق، 44.8%ی لەسەر ئاستی عێراق لەلایەن خاوەنەکانیانەوە وەرگیراونەتەوە.
پارێزگای دهۆک لە پلەی یەکەمدایە لەسەر ئاستی هەرێمی کوردستان و عێراق لە رووی وەرگرتنەوەی کارتی بایۆمەتری نوێ. لە 91 هەزار و 782 کارتی نوێ لەو پارێزگایە 66.7%یان وەرگیراوەتەوە.
پارێزگای نەجەف لەسەر ئاستی عێراق کەمترین ئاستی لە وەرگرتنەوەی ئەو کارتانە هەبووە، کە لە کۆی 126 هەزار و 869 کارتی بایۆمەتری نوێی دەنگدان، تەنیا 28.5%یان وەرگیراونەتەوە.
بە گوێرەی ئامارەکە، لە پارێزگای سلێمانی 134 هەزار و 825 کارتی بایۆمەتری نوێ تۆمار کراون کە 51.5%یان وەرگیراونەتەوە. لە پارێزگای هەولێر 162 هەزار و 230 کارتی نوێی دەنگدان تۆمار کراون کە 54.5%یان وەرگیراونەتەوە. رێژەی وەرگرتنەوەی ئەو کارتانە لە کەرکووک 55.3% بووە لە کۆی 150 هەزار و 341 کارتی بایۆمەتری نوێی دەنگدەرانی ئەو پارێزگایە.
لە کۆی 3.5 ملیۆن کارتی بایۆمەتری نوێ، 475 هەزار و 719 یان لە قۆناخی چاپکردندان، یەک ملیۆن 504 هەزار و 320 کارتى چاپکراون و دابەش نەکراون.
بۆ هەڵبژاردنی پەرلەمانی عێراق 21.4 ملیۆن کەس دەتوانن دەنگ بدەن کە کارتی بایۆمەتری دەنگدانیان هەیە.
دەنگدان بۆ هەڵبژاردن بە سیستمی ئەلیکترۆنی و لە رێگەی کارتی بایۆمەترییەوە دەبێت کە بڕیارە لە 11ی تشرینی دووەمی ئەم ساڵ ئەنجام بدرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ