کوردستان
لیزا فەلەکەدین کاکەیی، ئەندامی کۆمیتەی ناوەندی و یاریدەدەری بەشی هەڵبژاردنی پارتی دیموکراتی کوردستان
رووداو دیجیتاڵ
یاریدەدەری بەشی هەڵبژاردنی پارتی دیموکراتی کوردستان دەڵێت، رۆژی شەممە ئاهەنگێکی فراوانی بانگەشەی هەڵبژاردن لە کەرکووک دەکەن.
ئەمڕۆ پێنجشەممە، لیزا فەلەکەدین کاکەیی، ئەندامی کۆمیتەی ناوەندی و یاریدەدەری بەشی هەڵبژاردنی پارتی دیموکراتی کوردستان بە تۆڕی میدیایی رووداوی راگەیاند، رۆژی شەممە ئاهەنگێکی فراوانی بانگەشەی هەڵبژاردن لە کەرکووک دەکەین و بەرپرسانی باڵای پارتی لە سنوورەکە و سەرجەم بەربژێرەکان ئامادە دەبن.
رۆژی هەینی، 3ـی تشرینی یەکەمی 2025، بانگەشەی هەڵبژاردن لە هەرێمی کوردستان و عێراق دەستیپێکرد، لیست و هاوپەیمانی و بەربژێرە سەربەخۆکان دەستیان بە بانگەشە کرد و هەوڵی کۆکردنەوەی دەنگ دەدەن بۆ ئەو هەڵبژاردنەی بڕیارە رۆژی 11ـی تشرینی دووەمی 2025 بەڕێوەبچێت.
لیزا فەلەکەدین گوتی، لای پارتی هەمیشە کەرکووک تایبەتمەندی خۆی هەبووە و گرنگییەکی تایبەتی پێدراوە، لەم هەڵبژاردنەشدا هاوشانی بازنەکانی دیکەی کوردستان، کەرکووک سەنگی خۆی لای پارتی دەبێت و ئامانجمانە جارێکی دیکە بیسەلمێنینەوە کە کورد هەرگیز دەستبەرداری ئەو پارێزگا گرنگەی خۆی نابێت.
د. سیروان عارەب، بەربژێری پارتی دیموکراتی کوردستان لە بازنەی هەولێر، بە تۆڕی میدیایی رووداوی راگەیاند: "لە هەفتەی رابردووەوە، لە رێگەی سۆشیاڵ میدیا و هەڵواسینی فلێکسەوە دەستمان بە بانگەشەی هەڵبژاردن کردووە، بەڵام تاوەکو ئێستا بە فەرمی دەستی پێنەکراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ