ئێران: چەند جارێک هێرش کرایە سەر تاران

 

رۆژی چوارشەممە 18ی حوزەیرانی 2025، میدیای ئێران بڵاویکردەوە: "دوانیوەڕۆی ئەمڕۆ چەند جارێک دەنگی تەقینەوە لە شوێنی جیاوازی تاران بیسترا."

 

میدیای ئێران باس لەوە دەکات کە لە لایەن ئیسرائیلەوە هێرش کراوەتە سەر بینای مانگی سووری تاران.

 

جەنگی تاران و تەل ئەڤیڤ رۆژی هەینی دەستی پێکرد.

 

رۆژی چوارشەممە هەریەکە لە عەلی خامنەیی، رێبەری کۆماری ئیسلامیی ئێران و دۆناڵد ترەمپ، سەرۆکی ئەمریکا لەبارەی جەنگەکە قسەیان کرد. 

 

عەلی خامنەیی رەتی کردەوە حکومەتی وڵاتەکەی دەستپێشخەری ئەو جەنگە بووبێ کە لەگەڵ ئیسرائیل هەڵگیرساوە و گوتی: "ئەو رووداوە کاتێک روویدا کە بەرپرسانی ئێمە سەرقاڵی دانوستاندنی ناڕاستەوخۆ بوون لەگەڵ ئەمریکا و هیچ نیشانەیەک لە جووڵەی تووند و سەربازی و سەخت لەلایەن ئێرانەوە نەبوو".

 

عەلی خامنەیی پەیامێکی ئاراستەی دۆناڵد ترەمپ، سەرۆکی ئەمریکا کرد و گوتی: "سەرۆکی ئەمریکا لە هەندێک قسەی قبووڵنەکراودا بە راشکاوی داوا لە گەلی ئێران دەکات خۆیان بەدەستەوە بدەن، بەڵام پێیان دەڵێین: یەکەم، هەڕەشە لەوانە بکەن کە لە هەڕەشە دەترسن. گەلی ئێران باوەڕیان بەو ئایەتەی قورئان هەیە "وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ کُنْتُمْ مُؤْمِنِینَ" و هەڕەشە هیچکات کاریگەر لەسەر هەڵسوکەوت و بیرکردنەوەی گەلی ئێران دانانێت. دووەم، گوتنی ئەو قسەیە بە گەلی ئێران کە وەرن و خۆ بەدەستەوە بدەن، قسەیەکی ژیرانە نییە و کەسانی تێگەیشتوو کە ئێران و گەل و مێژووی ئێران دەناسن، هیچکات بە زمانی هەڕەشە قسە لەگەڵ ئەو گەلە ناکەن، چونکە گەلی ئێران خۆی بەدەستەوە نادات و ناچێتە ژێر باری دەستدرێژی هیچ لایەنێک".

 

ئەمڕۆ چوارشەممەش دۆناڵد ترەمپ لە وەڵامی هاوکاریکردنی ئیسرائیل لە هێرشکردنە سەر ئێران گوتی: "لەوانەیە بیکەم، لەوانەشە نایکەم. کەس نازانێت چی دەکەم."